مصطلحات جداويه

أبو كلب
وهادي الكلمة تنقال لما يكون في شي ما يعجبك هههههههههاي يعني زي لمن يكون جوالك قديم ومعدوم العافيه تقول عليه جوال أبو كلب ولمن يكون قلمك ما بيكتب زي الأوادم ويقطع تقول قلم
أبو كلب





تشبيك

: ودي الكلمة معروفه وانتشرت بمختلف ارجاء المعمورة ومعناها انه لمن واحد يقول انا شبكت فلانه يعني انا خليتها تعجب فيا وتحبني ولا تكلمني وزي كدا



دافور

: دافور معناها زمان في الحجاز الفرن ولكن دحين صار معناها البنت او الولد الشاطر\ة في الدراسة نقول عنه\ا دافور\ه اللي دايمن شغال عالكتب ولا يسيبها زي ما يسموه المصارية عثة كتب



دعس

: دي الكلمة تنقال للاقدام على الشي وتنفع مرادف لكلمة قدام يعني لمن مثلا يجي احد يقولك تيجي نروح التحلية ترد عليه وتقول والله دعس يعني يلا معاك

ولا هيا شباب نلعب كورة يقولولو ادعس

زي الكرتوووون :
تنقال للواحد الأهبل






شوربة

: طبعا كلنا نعرف الشوربة احلى شي عندنا هنا شوربة الحب على الفطور ياسلام سلم لكن هنا معناها غير فلمن انته تقول شوربه يعني شي سهل فلمن مثلا يكون عندك اختبار ويكون سهل جدا تقول الاختبار كان شوربة وهكذا
ولا مسلا تكلم احد وتقولو انا اروح شوربه ..
يعني اروح وطي ..

ولا تيجي المدام تجبلك الاكل تقوم تقولها حياتي من غيرك شوربة



صاروخ

: هههههههاي طبعا نعرف الصواريخ لكن هنا معناها شي ثاني معناها البنت الحلوة فلمن الاولاد يشوفو بنت حلوة يقولو عنها صاروخ




طقطقة

: ودي الكلمة تنقال لمن تبغى تتسلي في واحد يعني تستعبط عليه وهوا اهبل يكون مسكين على نياته وتلاقي ياما شباب مثلا متجمعين يقولو لو جا فلان نطقطق عليه ولا تلاقي واحد يجي يقول امس طقطنا على راس فلان وزي كده




كاي

: وهادي هيا ضحكة الشباب الجديدة ويضحكوها وقت التريقة والشماتة و لا دحين صار الضحك تقول كااااااي بصوت عالي وتمد الألف



هبقة
: هبقة زمان اعتقد كان معناها سرقة لكن دحين اتغير المعنى فلمن تقول مثلا والله هبقت انا والشباب ورحنا الكباين متلا فهبقة فهنا معناها طلعة وليها معنى تاني بمعنى هروب زي لمن طالب يقول أمس هبقت من المدرسة يعني شردت منها او تسوي حاجة غريبة على حركاتك انتا تقول يا عمي هبقة





يلعن ام الفله ..

وهادي من الكلمات الي ماسكه في لساني ...

لمن يكونو في شباب وعجبتهم مره الطلعه ولا في اولا يبسطو الواحد يطلعو يقومو يقولو على الطلعه متلا يلعن ام الفله ..



قويه ..

لمن يسير شي مو عاجبك ولا شي كده مو زي الناس ..
تقول قوييييييييييييه بشد الياء


كووووووول ..

وتنقال على أي شي يعجبهم ..
وهادي حكتر منها ..




هيااا خير


كلمتي المعتادة

لما يسير شي مفاجيء ولا يكون في حاجة غريبة كدا ولا باسوي نفسي مستغرب ولا باستهبل اني مش مستوبع فعلى طول
هيااااا خيييييييييييييير



لاتدف

كلمه حلوه وتنقال لمن تكون تتكلم ومتحمس في الهرجه ومتفعل في كلامو
ويأشر بيدو كده ويطلع فيها وينزل .. ولا واحد معصب وبيهزئ في الكلام ..
ولا كده واحد يقول يلا بسرعه سوي كده دحين ..
تقوم تقولو لاتدف




اصرفها.. اخرشها

هههههههههههاي كلمه في اللزيز ..
عندك كده كدبه ومنتى عارف تكزبها وخايف وعامل الولد الي ماعمرو يكزب ..
وانت دحين في ورطه ولازم تكزب ..
يقوم صاحبك يقولك ياشيخ خلاص اخرشها ولا اصرفها

ولا سويت مصيبة وتبغا تلف الموضوع فتبدا تفكر كيف تخرشها ولا تصرفها


حبتين

كلمات اعحاب


وبـــــس

يعطيك العافيه
اختي